संगमनेर नगरपरिषद निवडणुकीची रणधुमाळी चांगलीच रंगात आली असून शहरात प्रचाराला वेग आला आहे. या पार्श्वभूमीवर महायुतीचे आमदार अमोल खताळ शहरातील प्रभागांमध्ये पायी फिरून नागरिकांशी थेट संवाद साधत आहेत. त्यांच्या या जनसंपर्क मोहीमेचे विशेष आकर्षण ठरत आहे ते म्हणजे ‘लाडक्या बहिणी’ म्हणून ओळखल्या जाणाऱ्या महिलांचा मोठा सहभाग पाहवयास मिळत आहे.
प्रभागनिहाय भेटीत आमदार खताळ साध्या-सरळ नागरिकांपर्यंत पोहोचत आहेत. चहाच्या टपरीवर, छोट्या दुकानांवर, घरांच्या ओट्यांवर उभे राहून ते लोकांच्या अडीअडचणी जाणून घेत आहेत.या भेटींचे सर्वाधिक वैशिष्ट्य म्हणजे महिलांची वाढती उपस्थिती. अनेक प्रभागांत आमदार खताळ आल्याची चाहूल लागताच महिलांची गर्दी होत आहे.अनेकजणी थेट संवाद साधून आपली मते व्यक्त करतात. काही महिलांनी सांगितले की, आमच्या लाडक्या भावाने गेल्या काही वर्षांत अनेक बहिणींची कामे मार्गी लावली. कोणतीही अडचण सांगितल्यावर तत्परतेने ती सोडवली आहे.
याच विश्वासामुळे त्यांच्या फेरीला महिलांकडून प्रचंड प्रतिसाद मिळत असल्याचे दिसते. अनेक ठिकाणी महिलांनी घरगुती तसेच स्थानिक प्रश्न मांडत आहे. निवडणुकीच्या तोंडावर सर्वच राजकीय पक्षांनी प्रचाराला वेग दिला असताना, आमदार अमोल खताळ यांच्या प्रभागभेटींमध्ये होणारी ‘लाडक्या बहिणींची गर्दी’ ही शहरातील चर्चेचा प्रमुख विषय ठरू लागली आहे. येणाऱ्या नगरपरिषद निवडणुकीत महिलांचा सहभाग निर्णायक ठरेल, असे चित्र शहरात दिसत आहे.
