संगमनेर शहरातील १३१ वर्षांची ऐतिहासिक परंपरा लाभलेल्या रंगारगल्ली येथील ‘इच्छापूर्ती गणेश’ म्हणून ओळखल्या जाणाऱ्या मानाच्या पहिल्या गणपतीच्या विसर्जन सोहळ्याची सुरुवात श्री सोमेश्वर मंदिरात महादेवाची तसेच गणपती बाप्पांची विधिवत पूजा करून करण्यात आली. यावेळी संगमनेरच्या नगराध्यक्षा डॉ. मैथिली सत्यजीत तांबे आणि आमदार सत्यजीत तांबे यांनी सपत्नीक श्री सोमेश्वर मंदिरात उपस्थित राहून महादेवाचे व गणरायाचे मनोभावे दर्शन घेतले.
तब्बल १३१ वर्षांची परंपरा लाभलेल्या या मानाच्या गणपतीला ‘इच्छापूर्ती गणेश’ म्हणून संगमनेर शहरात विशेष श्रद्धेचे स्थान आहे. दरवर्षीप्रमाणे यंदाही विसर्जन सोहळ्याला सुरुवात करण्यापूर्वी श्री सोमेश्वर मंदिरात धार्मिक विधी आणि पूजा करण्यात आली. त्यानंतर पारंपरिक पद्धतीने गणरायाची विसर्जन मिरवणूक काढण्यात आली.
या विसर्जन सोहळ्यात तांबे दाम्पत्याने सहपरिवार सहभागी होत गणरायाला भावपूर्ण निरोप दिला. संगमनेरच्या धार्मिक, सामाजिक आणि सांस्कृतिक जीवनाशी जोडलेली ही १३१ वर्षांची परंपरा आजही मोठ्या श्रद्धेने जपली जात आहे. गणरायाच्या विसर्जन सोहळ्यात सहभागी होताना या परंपरेचे जतन आणि पुढील पिढीकडे तिचे हस्तांतरण करण्याची भावना उपस्थितांच्या मनात दिसून आली.
