संगमनेरच्या मायबाप मतदारांनी विधानसभेत गेल्या चाळीस वर्षांची सत्ता उलथवून टाकत ऐतिहासिक परिवर्तन घडवून आणले. जनसेवक, संघर्षशील व सर्वसामान्य जनतेच्या विकासाची तळमळ असलेले कार्यकर्ते आमदार अमोलभाऊ खताळ यांना लोकप्रतिनिधी म्हणून निवडून दिले.
आमदार अमोलभाऊ खताळ यांनी आपल्या आमदारकीच्या केवळ एका वर्षातच संगमनेर शहर आणि तालुक्यात कोट्यवधी रुपयांचा निधी आणला. त्यामुळे मामा-भाचे आणि त्यांच्या ठेकेदार टोळीची दुकानदारी बंद झाली असून, त्यांचा जळफळाट आता सर्वांना दिसतो आहे. म्हणूनच त्यांच्या पक्षातील बगलबच्चे बोगस आरोप करत आहेत, कारण त्यांच्याकडे आता दुसरा पर्यायच उरलेला नाही.
जायंट किलर जनसेवक आमदार अमोलभाऊ खताळ यांनी फक्त अकरा महिन्यांतच “लोकप्रतिनिधी कसा असावा आणि काय करू शकतो” याची चुणूक दाखवून दिली.
शिवसेना पक्षप्रमुख आणि राज्याचे उपमुख्यमंत्री एकनाथ शिंदे यांच्या नगरविकास खात्यामार्फत संगमनेर शहरासाठी कोट्यवधींचा निधी उपलब्ध करून दिला. त्यामुळे चाळीस वर्षांचा अनुशेष भरून काढला जात असून, शहराच्या विकासाची घोडदौड आता जोरात सुरू आहे. त्यामुळे तुमच्या सारख्या “पप्पू-टक्कूंना” पोटदुखी होणं साहजिकच आहे.
सोमेश्वर दिवटे, तुम्ही पाच वर्षे फक्त “लक्ष्मी-कृपेने” नगरसेवक झाला होता, हे जनतेला माहीत आहे. यशोधन मधून प्रेस नोट लिहवून प्रसिद्ध करण्याऐवजी, नगरपालिकेत जाऊन निधी मंजूर झाला का नाही याची खात्री करून घ्या. असे बालिश विधान करून जनतेची दिशाभूल करण्याचा प्रयत्न करून काहीही साध्य होणार नाही.
चाळीस वर्षे नगरपालिकेत एकहाती सत्ता उपभोगताना तुम्ही व तुमचे ठेकेदार कार्यकर्ते किती भ्रष्टाचारात गुंतले होते, हे उघड झाले तर तुम्हाला शहरात फिरायची सुद्धा लायकी राहणार नाही. नगरसेवक असताना कोणाच्या परवान्यावर, कोणासोबत किती बोगस कामे केली, किती पैसे कमावले तसेच उसतोडणी कामगारांना किराणा माल पुरवठा व शालेय आहाराच्या टेंडरमधील तुमचे पराक्रमही जनतेला माहीत आहेत.
शहरातील सहकारी संस्था आणि कारखाने, जे शेतकऱ्यांच्या पैशातून उभे राहिले, त्यांना कर्जबाजारी करून तुम्ही स्वतःच्या प्रसिद्धीसाठी ‘थ्री इडियट्स’चे फ्लेक्स लावता, हे जनतेला दिसत आहे.
शेतकऱ्यांच्या कष्टाच्या पैशावर राजकारण करून, त्यांच्याच टाळुवरच लोणी खाण्याचा तुमचा कार्यक्रम आता जनतेला कळला आहे. संगमनेरची जनता आता एवढी दुधखुळी राहिली नाही.
संगमनेर तालुक्यातील स्वाभिमानी व सुजाण जनता स्थानिक स्वराज्य संस्थांच्या निवडणुकीत तुम्हाला नेस्तनाबूत केल्याशिवाय राहणार नाही. तुमच्या नेत्यांनी एकशेचाळीस वर्षांची काँग्रेस संगमनेरातून हद्दपार केली, आणि आज तुमची अवस्था “न घरका, न घाटका” अशी झाली आहे. खरंच, तुमच्या “अतिमागास बुद्धी”ची कीव येते.
उगाच कांगावा करण्यापेक्षा तुमच्या चाळीस वर्षांच्या निधीचा हिशोब आणि त्यातील भ्रष्टाचार विरुद्ध आमदार अमोलभाऊ खताळ यांच्या अकरा महिन्यांच्या विकासाच्या झंझावाताचा तुलनात्मक खुला सामना करण्याचे आव्हान मी तुम्हाला देतो.
हिम्मत असेल तर वेळ आणि ठिकाण ठरवा.. आणि जनतेसमोर सचोटीनं सामना करा!
शिवसेनेचे शहर प्रमुख दिनेश फटांगरे
