- संगमनेरला पुनर्वैभव प्राप्त करून देण्यासाठी सर्व उमेदवार कटिबद्ध – आ. सत्यजित तांबे
लोकनेते बाळासाहेब थोरात यांच्या मार्गदर्शनाखाली सुसंस्कृत व वैभवशाली असलेले संगमनेर शहर मागील एक वर्षापासून अशांत झाले आहे. शहरात अमली पदार्थांसह सुरक्षितता धोक्यात आली असून संगमनेर शहरात वाढलेली गुंडगिरी दडपशाही तस्करी थांबवून संगमनेरला पुन्हा गत वैभव प्राप्त करून देण्यासाठी संगमनेर सेवा समितीचे सर्व उमेदवार कटिबद्ध राहतील असा विश्वास आमदार सत्यजित तांबे यांनी दिला असून सेवा समितीच्या सर्व उमेदवारांना नागरिकांचा मोठा पाठिंबा मिळत आहे.
संगमनेर नगरपालिकेच्या निवडणुकीत आमदार सत्यजित तांबे यांनी संगमनेर सेवा समितीच्या उमेदवारांच्या प्रचारात जनता नगर, गणेश नगर, विद्यानगर, रंगार गल्ली या विविध प्रभागांमध्ये सेवा समितीच्या उमेदवारांच्या प्रचार केला. यावेळी समवेत नगराध्यक्ष पदाच्या उमेदवार डॉ.मैथिलीताई तांबे, दिलीपराव पुंड, विश्वासराव मुर्तडक, सीमाताई खटाटे, डॉ.अनुराधा सातपुते, किशोर टोकसे,प्रियांका शहा,अमर कतारी,प्रसाद पवार,मुजीब खान पठाण,नितीन अभंग उपस्थित होते.
यावेळी बोलताना आ.तांबे म्हणाले की, संगमनेर शहर हे सुसंस्कृत आणि समृद्ध शहर अशी राज्यात ओळख आहे. निळवंडे धरण थेट पाईपलाईन योजनेमुळे शहरात 24 तास मुबलक पाणी मिळत असून 35 गार्डन आहेत. विविध वैभवशाली इमारती उभ्या राहिल्या आहेत. विश्वासाची बाजारपेठ,शांतता,सुरक्षितता आणि बंधुभाव हे शहराचे वैशिष्ट्य आहे.
नगरपालिकेने कायम नागरिकांना चांगल्या सुविधा दिल्या असून मागील चार वर्षापासून नगरपरिषदेमध्ये प्रशासन आहे. प्रशासनाच्या काळामध्ये अनेक कामे रखडली आहेत. त्यामुळे नागरिकांच्या अडचणी निर्माण झाल्या. हे सर्व कामे तातडीने मार्गी लावण्या बरोबर संगमनेर 2.0 हा नवीन संकल्प घेऊन आपण पुढील काळात काम करणार आहोत. संगमनेर सेवा समितीमध्ये राजकारण विरहित सर्व नागरिक एकत्र आले असून सर्वांच्या संमतीने उमेदवार दिले आहेत हे सर्व उमेदवार शहराच्या विकासासाठी कायम कटिबद्ध राहतील.
मागील एक वर्षापासून संगमनेर शहरांमध्ये दहशत,गुंडगिरी,दादागिरी,दडपशाही आणि अमली पदार्थांची मोठी तस्करी वाढली आहे. ही संगमनेर शहरासह तालुक्यातील नागरिकांसाठी मोठी चिंतेची बाब ठरली आहे. याबाबत वरिष्ठ नेते बाळासाहेब थोरात यांनी सुद्धा चिंता व्यक्त केली आहे.
संगमनेरात अशी संस्कृती कधीही नव्हती. ती संस्कृती कोण निर्माण करत आहे ते जनतेच्या आता लक्षात आले आहे. अशा लोकांना थांबवण्यासाठी संगमनेरकर म्हणून आपण सर्व एकत्र आलो आहोत आणि त्यामुळे जनतेचा मोठा पाठिंबा असल्याचे ते म्हणाले.
आमदार तांबे व संगमनेर सेवा समितीचे कार्यकर्ते पदाधिकारी आणि उमेदवार यांनी काढलेल्या विविध फेऱ्यांना नागरिकांचा मोठा प्रतिसाद मिळत असून राजकारण विरहित सेवा समिती संगमनेरकरांना भावली आहे.
संगमनेर सेवा समितीसाठी युवकांचा मोठा उत्साह
संगमनेर कर म्हणून एकत्र आलेले राजकारण विरहित सर्व नागरिक म्हणजे संगमनेर सेवा समिती आहे. संगमनेरची एक सुसंस्कृत राजकारणाची परंपरा असून निर्माण झालेली दहशत दडपशाही आणि अमली पदार्थांच्या तस्करी पासून संगमनेरला वाचवण्यासाठी तरुण एकवटले असून तरुणांचा मोठा उत्साह सेवा समितीच्या पाठीशी उभा राहिला आहे.
