संगमनेर येथील निमाई डेअरीचे शुभम भास्करराव घुले यांना व्हॉइस ऑफ मीडिया तर्फे देण्यात येणारा राज्यस्तरीय युवा उद्योजक पुरस्कार पंढरपूर येथे झालेल्या दोन दिवसीय राज्य शिखर अधिवेशनात राजस्थानचे राज्यपाल हरिभाऊ बागडे यांच्या हस्ते प्रदान करण्यात आला.
या वेळी व्यासपीठावर व्हॉइस ऑफ मीडियाचे संस्थापक अध्यक्ष संदीप काळे, परमपूज्य लोकनाथ स्वामी महाराज, महाराष्ट्र प्रदेशाध्यक्ष अनिल मस्के, उपाध्यक्ष अजित कुंकू, युवा उद्योजक राणा सूर्यवंशी यांसह अजित कुंकूलोळ, मुख्य संयोजक गोरक्षनाथ मदने, राज्य विंग प्रमुख अमोल मतकर, अहिल्यानगर जिल्हाध्यक्ष बाळासाहेब गडाख अनेक मान्यवरांची उपस्थिती होती.
या राज्य शिखर अधिवेशनासाठी संपूर्ण महाराष्ट्रातून जवळपास दोन हजार पत्रकार पंढरपुरात आले होते. पत्रकारांना मार्गदर्शन व शपथ देण्यासाठी राज्यपाल हरिभाऊ बागडे विशेष उपस्थित होते.
शुभम घुले हे निमाई दूध डेअरीच्या माध्यमातून गिर गाई या गावठी जातीच्या जनावरांचे संवर्धन करतात. त्यांच्या गोठ्यात सध्या गिर गाईंची साडेतीनशेहून अधिक जनावरे आहेत. या गाईंच्या दुधापासून ते विविध बेकरी पदार्थ, उच्च प्रतीची मिठाई, तूप, पनीर इत्यादी उत्पादने तयार करतात.
तसेच गोमूत्रापासून आयुर्वेदासाठी उपयुक्त औषधी द्रव्ये, तर गोमयापासून सेंद्रिय खते तयार करून ती शेतकऱ्यांना उपलब्ध करून दिली जातात. ग्रामीण भागातील शाश्वत शेती, नैसर्गिक उत्पादन आणि पारंपरिक पशुपालनासाठी ते करत असलेल्या या उल्लेखनीय कार्याची दखल घेऊन व्हॉइस ऑफ मीडियाने त्यांना हा राज्यस्तरीय सन्मान प्रदान केला.
शुभम घुले यांना पुरस्कार मिळाल्याबद्दल माजी मंत्री बाळासाहेब थोरात, विधानपरिषदेचे आमदार सत्यजित तांबे आणि विविध मान्यवरांनी अभिनंदन करून भावी वाटचालीसाठी शुभेच्छा दिल्या आहेत.
