संगमनेर तालुक्यातील पिंपळगाव कोंझिरा येथील प्रणव बबनराव कर्पे यांना शासनाने पदोन्नती दिली आहे. नगर विकास विभागाने नगररचना आणि मूल्य निर्धारण विभागातील सहाय्यक संचालक (नगररचना) या संवर्गातील आठ अधिकाऱ्यांना उपसंचालक नगररचना या पदावर पदोन्नती दिली आहे. मंत्रालय मुंबई येथे कार्यरत असलेले संगमनेरचे सुपुत्र प्रणव कर्पे मूळचे पिंपळगाव कोंझिरा येथील रहिवासी आहे.
त्यांचे वडील बबनराव कर्पे हे अहमदनगर जिल्हा मराठा शिक्षण प्रसारक मंडळाच्या न्यू आर्ट कॉलेज शास्त्र शाखेचे प्राध्यापक पदावरून सेवानिवृत्त झाले आहे .त्यांच्या मातोश्री पुष्पा कर्पे या संस्कृत मराठी या विषयाच्या प्राध्यापिका होत्या. प्रणव कर्पे यांनी यापूर्वी कोल्हापूर जिल्ह्यातील राधानगरी तालुक्यात अभयारण्य, राधानगरी धरण तसेच सभोवतालच्या क्षेत्राचा युको पर्यटन क्षेत्रात त्यांनी विशेष कामगिरी केली होती.
यापूर्वी त्यांना तत्कालीन मुख्यमंत्री एकनाथ शिंदे यांच्या हस्ते स्वराज्य अभियंता हिरोजी इंदुलकर पुरस्काराने सन्मानित करण्यात आलं होतं. महाबळेश्वर क्षेत्र विकास करण्यासाठी सातारा जिल्ह्यातील सातारा, जावळी, पाटण , तालुक्यातील 177 गावांसाठी महाराष्ट्र राज्य रस्ते विकास महामंडळाची विशेष नियोजन प्राधिकरण म्हणून त्यांनी काम बघितले आहे. याच कामाची दखल घेऊन राज्य शासनाने त्यांना पदोन्नती देऊन गौरव केला. उपसंचालक पदोन्नतीच्या याच आदेशामध्ये मंत्रालयातील अप्पर सचिव प्रणव कर्पे यांना उपसंचालक म्हणून पदोन्नती देत मंत्रालयातच नगर विकास विभागात उपसचिव म्हणून नेमणूक देण्यात आली आहे. त्यांच्या या पदोन्नती बद्दल नातेवाईक मित्रपरिवाराने अभिनंदन केले आहे.
