२७ सप्टेंबरपासून जिल्हाभरात काही ठिकाणी संततधार तर काही ठिकाणी मुसळधार पाऊस कोसळतोय, या पावसामुळे अनेक ठिकाणी शेतीपिकांबरोबरच घरांचंही मोठं नुकसान झालंय. संगमनेर तालुक्यातील पारेगांव बुद्रुक येथे रात्री पावसामुळे अतिशय गरीब परिस्थिती असलेल्या कुटुंबाचं राहतं घर पडलंय. आज पहाटे तीन वाजण्याच्या सुमारास हि दुर्घटना घडली असून सुदैवाने यात कोणतीही जीवितहानी झाली नाही मात्र संसारोपयोगी साहित्याचं मोठं नुकसान झालंय. गावामध्ये निमोण रस्त्याच्या शेजारी राहणाऱ्या गंगुबाई जनार्दन घोटेकर आणि शकुंतला वर्पे या दोघी बहिणींच्या घराची भिंत जमीनदोस्त झाल्याची घटना घडली आहे.
हे कुटुंब पूर्णपणे निराधार असून या दुर्घटनेत त्यांचं मोठं आर्थिक नुकसान झालंय तर आता ते कुटुंब रस्त्यावर आलंय. आज सकाळी पंचकमिटीने या नुकसानग्रस्त घराचा पंचनामा केला असून यामध्ये जवळपास साडेतीन लाखांचं नुकसान झालं असून शासनाने त्वरित या कुटुंबाला मदत करावी अशी अपेक्षा कुटुंबासह गावकऱ्यांनी व्यक्त केलीये.
ग्राममहसूल अधिकारी तसेच गणेश बाळू गडाख, सारंगधर माधव गडाख, लक्ष्मण गोविंद गडाख, दौलतराव पुंजाजी गडाख, रावसाहेब फकिरा वाकचौरे, बाळासाहेब रंगनाथ गोडगे आणि शरद देवराव गडाख यांनी हा पंचनामा केलाय. या दुर्घटनेमुळे हे कुटुंब उघड्यावर आलं असून त्यांना संसारोपयोगी साहित्य आणि पुन्हा उभारी देण्यासाठी आर्थिक मदतीची नितांत गरज असून शासनाने तात्काळ दखल घेत मदत करावी अशी मागणी करण्यात आलीये.
या दुर्घटनेत घराच्या पूर्व-पश्चिम बाजूच्या भिंती, सिमेंटच्या पत्र्याचे छत कोसळले असून संसारोपयोगी साहित्य कपडे, धान्य आणि किराणा साहित्याचं नुकसान झालंय.
आगोदरच निराधार आणि त्यात पावसाने ओढावलेलं संकट यामुळे हे कुटुंब बेजार झालं असून त्यांना तातडीने आर्थिक मदतीची गरज आहे. सामाजिक कार्यकर्ते आणि संस्थांनी यात पुढाकार घेऊन शासनानेही याची दखल घेत या कुटुंबाला पुन्हा उभं राहण्यासाठी मदत करणं गरजेचं आहे.
त्याचबरोबर रात्री गावात एक दुकान आणि देवांच्या मंदिरावर चोरट्यांनी डल्ला मारला असून त्यातही मोठा मुद्देमाल चोरीला गेल्याची घटना घडली आहे. या नैसर्गिक आपत्तीचा गैरफायदा घेत चोरट्यांनीही आला डाव साधत लूटमार केल्याने दुहेरी संकट ओढावलंय. पोलिसांनीही या चोऱ्यांची दखल घेऊन चोरट्यांचा शोध लावण्याची मागणी केली जातीये.
बाळासाहेब गडाख, संगमनेर
