- आ. सत्यजित तांबे यांच्या संकल्पनेतून महावादनाचा भव्य मेळावा
लोकनेते बाळासाहेब थोरात यांच्या मार्गदर्शनाखाली वैभवशाली ठरलेल्या संगमनेर शहर व तालुक्यात सातत्याने विविध उपक्रमांचे आयोजन होत असून आय लव संगमनेर या चळवळीच्या माध्यमातून तालुक्यातील स्थानिक कलाकारांच्या कलागुणांना उस्फूर्त प्रतिसाद मिळावा याकरता शुक्रवार दिनांक 29 ऑगस्ट 2025 रोजी सायंकाळी 6 ते 10 या वेळेत संगमनेर बस स्थानकासमोर भव्य पारंपारिक वादकांचा महामेळा व महावादनाचे आयोजन करण्यात आले असल्याची माहिती आयोजक आमदार सत्यजित तांबे यांनी दिली आहे.
या अभिनव महावादन बाबत अधिक माहिती देताना आ. सत्यजित तांबे म्हणाले की, संगमनेर तालुक्याला मोठी सांस्कृतिक आणि ऐतिहासिक परंपरा लाभली आहे. शहरातील अनेक मंडळांनी वादन ग्रुप स्थापन केले असून राज्यभरात त्यांचा नावलौकिक झाला आहे. राज्यात सध्या गणेशोत्सवाच्या आनंदाचे पर्व सुरू आहे. या अनुषंगाने या संगमनेर शहरातील गणेश उत्सवाची शोभा वाढावी व स्थानिक कलाकारांच्या कलागुणांना उत्स्फूर्त प्रतिसाद मिळावा याकरता आय लव संगमनेर या संस्थेच्या माध्यमातून संगमनेर मधील विविध वादन ग्रुपचे भव्य महावादन व महामेळावा होणार आहे
शुक्रवारी सायंकाळी संगमनेर बस स्थानका समोर 6 ते 10 या वेळेमध्ये संगमनेर शहरातील तांडव, हिंदू राजा, छावा, एकलव्य, रुद्र, हे ढोल पथक व झांजरी पथक सहभागी होणार असून यामधील सुमारे 350 कलाकारांच्या सहभागांमध्ये हे महावादन होणार आहे.यावेळी काँग्रेस पक्षाचे वरिष्ठ नेते बाळासाहेब थोरात, मा आमदार डॉ. सुधीर तांबे, सौ दुर्गाताई तांबे,डॉ. जयश्रीताई थोरात, डॉ. मैथिलीताई तांबे यांच्यासह विविध मान्यवर उपस्थित राहणार आहेत.
तरी आय लव संगमनेर या चळवळीमार्फत होणाऱ्या वादकांचा महामेळा व महावादन कार्यक्रमासाठी शहरातील नागरिक युवक व कार्यकर्त्यांनी मोठ्या संख्येने उपस्थित राहावे असे आवाहन आय लव संगमनेर, ही सामाजिक संस्था आणि तांडव, हिंदू राजा, रुद्र, छावा व एकलव्य, ढोल पथकाच्या वतीने करण्यात आले आहे. या महावादन मेळाव्याच्या जय्यत तयारीसाठी संगमनेर मधील विविध कार्यकर्ते विशेष परिश्रम घेत आहेत.
संगमनेरच्या सांस्कृतिक क्षेत्राला मोठे व्यासपीठ
संगमनेर मधील अनेक गुणी कलावंत असून ढोल पथकाच्या माध्यमातून राज्यभर ते काम करत आहेत. या विविध पथकांमधील कलाकारांना स्थानिक पातळीवर मोठी संधी मिळावी या उद्देशाने आमदार सत्यजित तांबे यांच्या संकल्पनेतून महावादन मेळावा होत असून संगमनेर मध्ये प्रथमच होत असलेला हा महावादन मेळावा राज्यासाठी मार्गदर्शक ठरणार असल्याचे डॉ. मैथिलीताई ताई तांबे यांनी म्हटले आहे
